ನಮ್ಮ ರಾಮಿ

ಬೆಚ್ಚಗಿನ ಗೂಡು
ಒಂದಷ್ಟು ಓಣ ಹುಲ್ಲು
ಇಮಾಮಿ ಅಂಗಡಿ ಬಳಿಯಿಂದ
ಮೂಳೆ ತುಣುಕುಗಳು
ನೆಲ ಕೆರೆದು ಕೆರೆದು
ಉಗುರುಗಳ ನಡುವೆ ನೆತ್ತರು
ಜಿನುಗಿದಂತೆಲ್ಲ ಮಣ್ಣಲಿ ಮಣ್ಣಾಗಿತ್ತು

ಬಂದುಹೋಗುವರ ಮೇಲೊಂದು ಕಣ್ಣು
ಹತ್ತಿರ ಹೋದಂತೆಲ್ಲ ಮುದುರಿ ಮುದುರಿ
ಏನೋ ಬಚ್ಚಿಟ್ಟುಕೊಳ್ಳುವ ಆತುರ
ಕಣ್ಣಲಿ ಒಂದಷ್ಟು ಭಯ
ಇನ್ನಷ್ಟು ಹತ್ತಿರ ಹೋದರೆ
ಸಣ್ಣ ಕ್ರೋಧದ ಛಾಯೆ
ಬರದಿರೆನ್ನೆಡೆಗೆಂಬ ಎಚ್ಚರಿಕೆ ಮಾತು

ಮನದಲೂಂದಷ್ಟು ಭಯವಿತ್ತು ಎನಗೆ
ಆದರೂ ಧೈರ್ಯದಲಿ ಇಟ್ಟಿದ್ದೆ ಹೆಜ್ಜೆ
ನಾನೆಂದು ಅರಿತೊಡನೆ ಬಂದಿತ್ತು ಓಡಿ
ಮೈಮೇಲೆ ಎಗರುತ ಪ್ರೀತಿಯಲಿ ಒರಗುತ
ಪರಿಚಯಿಸಿತ್ತಂದು ತನ್ನಾರು ಮರಿಗಳ
ನಮ್ರತೆಯ ನಲಿವಿನಲಿ ನಮ್ಮ ರಾಮಿ

ಪವನ್ ಪಾರುಪತ್ತೇದಾರ:-

photo courtecy : Google