ಕೊಲ್ಲದಿರು ನನ್ನ

ಕೊಲ್ಲದಿರು ನನ್ನ
ಚೂಪಾದ ನೋಟದಲಿ ದ್ವೇಷವನು ಬೀರದೆ
ಬುಸುಗುಡುವ ನಾಗನಿಗೆ ಪೈಪೋಟಿ ತೋರದೆ
ಅಳಿದುಳಿದ ಉಸಿರನ್ನು ಅಲ್ಲಿಗೇ ನಿಲ್ಲಿಸಿ
ಉಶ್ಚ್ವಾಸ ನಿಶ್ಚ್ವಾಸ ಏನನ್ನು ಮಾಡಿಸದೆ
ಕೊಲ್ಲದಿರು ನನ್ನ

ಕೊಲ್ಲಲು ನಿನಗೇನು ಆಯುಧವು ಬೇಕಿಲ್ಲ
ನಿನ್ನ ಪ್ರೀತಿಯ ಮಾತುಗಳ ನಿಲ್ಲಿಸಿಬಿಡು ಸಾಕು
ಕಿರುನಗೆಯ ಮೆಲ್ಲಗೆ ನಿನ್ನೊಳಗೆ ಬಚ್ಚಿಟ್ಟುಬಿಡು
ಹುಡುಕುತ್ತಾ ಹುಡುಕುತ್ತ ಸತ್ತುಬಿಡುವೆ ನಾನು

ಬದುಕೋದು ಮರೆತಿರುವೆ ನಿನ್ನ ಸಂಗವ ಸೇರಿ
ಒಮ್ಮೊಮ್ಮೆ ಅನುಮಾನ ಬದುಕಲೇನು ಬೇಕೆಂದು
ಆಮ್ಲಜನಕಕೆ ನೀ ಪೈಪೋಟಿ ನೀಡಿರುವೆ
ನಿನ್ನ ಇರುವಿಕೆಯೆ ಸಾಕು ಇನ್ನೇನು ಬೇಕಿಲ್ಲ

ಕೊಲ್ಲದಿರು ನನ್ನ
ಎಲ್ಲ ಗುಟ್ಟನ್ನು ಹೇಳಿಬಿಟ್ಟಿರುವೆ ನಾನು
ನನ್ನ ಕೊಲ್ಲಲಿನ್ನು ಬಹಳ ಸುಲಭ ನಿನಗೆ
ನಿನ್ನ ಬಿಟ್ಟೊಂದು ಕ್ಷಣ ಇರಲಾರದೀ ಜೀವ
ನನ್ನ ನಾ ಹುಡುಕಲು ನಿನ್ನೊಳಗೆ ಬರಬೇಕು
ಕೊಲ್ಲದಿರು ನನ್ನ

ಪವನ್ ಪಾರುಪತ್ತೇದಾರ :-