ಒಂದು ಕವಿತೆ

ಕಾಗುಣಿತ ಕುಣಿಸುತ ಪದಗಳನು ಪೋಣಿಸಿ
ಕವಿತೆಯ ಹಾರವನು ಸೃಷ್ಠಿಸಿದರೆ ಸಾಕೆ
ಓದುಗನ ಮನಸಿಗೆ ತೊಡಿಸಬೇಕಲ್ಲವೆ
ಪಾಯಸವ ಮಾಡಿ ಚಮಚದಲಿ ಹಿಡಿದು
ದೂರದಿಂದಲೆ ಅದನ ಮೂಸಿ ಎಂದರೆ ಸಾಕೆ
ತಿನ್ನುಗನ ಎಲೆಯಲ್ಲಿ ಧಾರಾಳವಾಗ್ಬಡಿಸಿ
ಚಪ್ಪರಿಸೋ ಅಂದವ ನೋಡಬೇಕಲ್ಲವೇ

ಇಷ್ಟಕಷ್ಟಗಳ ಇಟ್ಟಿಗೆಯ ಕೂಡಿಸಿ
ಬಿನ್ನ ಭಾವಗಳ ಮರಳನ್ನು ಮಿಶ್ರಿಸಿ
ಕಾವ್ಯದಲೆ ಮನೆಯನ್ನು ಕಟ್ಟಿದರೆ ಸಾಕೆ
ಪರರನ್ನು ಕರೆದು ಓರೆಕೋರೆಗಳ ತಿಳಿದು
ಮೆಚ್ಚುಗೆಯ ಮಾತುಗಳ ಮುದವನ್ನು ಪಡೆದು
ಮನೆಯ ಬಗ್ಗೆ ತಾ ಗರ್ವ ಪಡಬೇಕಲ್ಲವೇ

ಒಂದೊಂದು ಚಕ್ರಕೂ ಕಲ್ಪನೆಯ ಬೆಸೆದು
ಮುಗಿದೋದ ಕಾಲವನು ಮತ್ತೆ ಮರುಸೆಳೆದು
ಒಳಗೊಳಗೆ ಹುದುಗಿಟ್ಟು ಕೂರುವುದು ಸಾಕೆ
ಓದುಗರ ಮುಂದೆ ಧೈರ್ಯದಲಿ ಇಟ್ಟು
ಪ್ರೀತಿಯ ತೈಲವನು ಸಾಲದಲಿ ಪಡೆದು
ಬರಹದ ಬಂಡಿಯಲಿ ಚಲಿಸಬೇಕಲ್ಲವೇ
ಬರಹದ ಬಂಡಿಯಲಿ ಚಲಿಸಬೇಕಲ್ಲವೇ

ಪವನ್ ಪಾರುಪತ್ತೇದಾರ