ಬದುಕಿನ ಬಂಡಿ

ಕಾಡುತಿದೆ ಮನದಲೇನೋ ದುಗುಡ
ಮರೆತು ಬಿಡುವೆನೋ ಏನೋ ಎಂಬ ಭಯ
ಸಿಂಬಳವ ಒರೆಸಿ ಸಿಹಿಯಾದ ಮಾತಾಡಿ
ಮುದ್ದಾದ ಪದ್ಯಗಳ ನಮ್ಮುಂದೆ ಹಾಡಿ
ಬದುಕ ಬಂಡಿಗೆ ಮೊದಲ ಗೇರು ಹಾಕಿದವರ
ಮರೆತು ಬಿಡುವೆನೋ ಏನೋ ಎಂಬ ಭಯ

ರಾಶಿ ಮನೆಕೆಲಸವ ಕೊಟ್ಟು
ತಪ್ಪು ಮಾಡಿದಾಗೆಲ್ಲ ಪೆಟ್ಟು ಕೊಟ್ಟು
ಬರೆಯದೇ ಬಂದಾಗ ಬರೆಯಿಟ್ಟು
ಗೆಣ್ಣುಗಳ ಊದಿಸಿ ತೊಡೆಪಾಯಸವ ನೀಡಿ
ಬದುಕ ಬಂಡಿಗೆ ಎರಡನೇ ಗೇರು ಹಾಕಿದವರ
ಮರೆತು ಬಿಡುವೆನೋ ಏನೋ ಎಂಬ ಭಯ

ಜಿಪ್ಪು ಹಾಕದಿದ್ದಾಗ ಗುಟ್ಟಾಗಿ ಹೇಳಿ
ಶಾಲೆ ತಪ್ಪಿಸಿದಾಗ ಜೊತೆಯಲ್ಲಿ ತಿರುಗಿ
ಈಜಾಡಿ ನಲಿದಾಡಿ ಆಗಾಗ ಹೊಡೆದಾಡಿ
ಅಗಲಿಕೆಯ ಕಣ್ಣೀರ ಈಗಲು ಸುರಿಸುತಿಹ
ಬದುಕ ಬಂಡಿಗೆ ಮೂರನೇ ಗೇರು ಹಾಕಿದವರ
ಮರೆತು ಬಿಡುವೆನೋ ಏನೋ ಎಂಬ ಭಯ

ಒಲವೇ ನೀನು ಮಂದಾರವೆಂದೂ
ಕಾಣುವೆ ಅಷ್ಟೆ, ಕೈಗೆಟಕದೆಂದು
ತನ್ನತನ ತಾನೇ ಕಳೆದುಕೊಂಡಾಗಿ
ಕಣ್ಣೀರ ಪಾಠವನು ಪ್ರೀತಿಯಲಿ ತಿಳಿಸಿದ
ಬದುಕ ಬಂಡಿಗೆ ನಾಲ್ಕನೇ ಗೇರು ಹಾಕಿದವರ
ಮರೆತು ಬಿಡುವೆನೋ ಏನೋ ಎಂಬ ಭಯ

ಅಡಿಗಡಿಗೆ ನಮಸ್ಕಾರ ಆಗಾಗ ಅಲಂಕಾರ
ತೀರ್ಥ ಪ್ರಸಾದಗಳಂತೂ ಲೆಕ್ಕವೇ ಇಲ್ಲ
ಮನೆಯಲ್ಲು ದೇವರು ಗುಡಿಯಲ್ಲು ದೇವರು
ಬದುಕ ಬಂಡಿಗೆ ಐದನೇ ಗೇರು ಹಾಕಿದವರ
ಬಂಡಿಯ ವೇಗವ ಶರವೇಗ ಮಾಡಿದವರ
ಮರೆತು ಬಿಡುವೆನೋ ಏನೋ ಎಂಬ ಭಯ

ಒಮ್ಮೆ ನಿಮ್ಮ ಬದುಕ ಬಂಡಿ ರೆವೆರ್ಸ್ ಗೇರ್ ಹಾಕಿ ನೋಡಿ ಸ್ನೇಹಿತರೆ, ನಿಮ್ಮ ಕಣ್ಣು ಒದ್ದೆ ಆಗದೆ ಇರದು....

ಪವನ್ ಪಾರುಪತ್ತೇದಾರ :-