ಎಂಜಲೆಲೆ

ಕಿತ್ತಾಟ ನಡೆಯುತಿತ್ತಲ್ಲಿ
ಅಸ್ತಿತ್ವದ ಹುಡುಕಾಟ ನಡೆಯುತಿತ್ತು
ತನ್ನವರ ನಡುವೆಯೇ ಹೊಡೆದಾಟ
ಕೂಗಾಟ ಎಳೆದಾಟ ರಂಪಾಟ
ಹಿರಿತನದ ಬಡಿದಾಟ

ಮೊದಲು ನಾ ಬಂದಿರುವೆ ಆಮೇಲೆ ನೀ
ನಾ ಮೊದಲು ಬಂದಿದ್ದು ಆದ್ಯತೆಯು ನನಗೆ
ನಿನ್ನದೀ ಸ್ಥಳವಲ್ಲ ಏಕೆ ಬಂದಿರುವೆ
ಹಿರಿಯನು ನಾನಿಲ್ಲಿ ಕೊಡಿ ಎನಗೆ ಅವಕಾಶ
ನಮ್ಮಕಡೆ ಜನ ಜಾಸ್ತಿ ಹೊರಡು ಏಕಿರುವೆ

ನಿಂತಲ್ಲಿನಿಂದಲೇ ಬೆದರಿಕೆಯ ಮಾತು
ಎಲ್ಲರಿಗೂ ಹಸಿವು ಹೊಟ್ಟೆಬಾಕರು ಎಲ್ಲ
ತಮ್ಮ ಹೊಟ್ಟೆಯಷ್ಟೇ ತುಂಬಿದರೂ ಬಿಡರು
ನಾಳೆಗೂ ನಾಳಿದ್ದಿಗೂ ಕೂಡಿಡುವ ಆಸೆ

ಕೊಬ್ಬ ಬೆಳೆಸಿಕೊಂಡು ಬೀಗುವ ಹಂಬಲ
ಮಕ್ಕಳು ಮರಿಮಕ್ಕಳಿಗೂ ಪಾಲು ನೀಡುವಾಸೆ
ತಾನೇ ಎಲ್ಲವನ್ನೆಳೆದು ಮನೆಗೆ ಹೋಗುವಾಸೆ
ಗಬಗಬನೆ ಮಡಚಿಟ್ಟು ಇನ್ನೇನು ಹೊರಡಲು

ಛತ್ರದ ಕಾವಲುಗಾರ ಬಂದ ದೊಣ್ಣೆಯನು ಹಿಡಿದು
ಓಡಿದವು ನಾಯಿಗಳು ಎಂಜಲೆಲೆಗಳ ಬಿಟ್ಟು


ಪವನ್ ಪಾರುಪತ್ತೇದಾರ