ಕೆರೆಯ ಕಲ್ಪನೆಯ ಹಮ್ಮು

ನಿಂತ ನೀರದು ಬಿಂಬ ತೋರಲು
ಹರಿವ ನೀರದು ಬಿಂಕ ತೋರುವುದು
ಎರಡಕ್ಕೂ ಅದರದೇ ಆದ ಹೆಮ್ಮೆ
ಇದಕ್ಕೆ ನಿಂತದ್ದೇ ಆದರೆ ಅದಕ್ಕೆ ಹರಿದದ್ದೆ

ಮನುಜನ ಜಡವನ್ನೆಲ್ಲ ಒಂದೆಡೆ
ಗುಡ್ಡೆ ಮಾಡಿ ಅವಿಸಿಬಿಡುವ ಚಾಣಾಕ್ಷತನ
ಕೊಳಕನ್ನೆಲ್ಲ ತನ್ನೊಡಲಲ್ಲಿ ತುಂಬಿಕೊಂಡು
ಹೂಳೆತ್ತಿಸಿಕೊಳ್ಳದೆ ತುಂಬು ಬಸುರಿಯಾದ ಹೆಮ್ಮೆ
ನಿಂತ ನೀರಿಗಾದರೆ

ಕಾಡೆನದೆ ಮೇಡೆನದೆ ಬೆಟ್ಟದಲಿ ಗುಡ್ಡದಲಿ
ತೆವಳುತಾ ಕುಂಟುತಾ ಗುದ್ದಾಡಿ ಹೊಡೆದಾಡಿ
ಕಲ್ಲುಗಳ ಪುಡಿಮಾಡಿ ಮರಳಿನ ಖನಿ ಮಾಡಿ
ಮನುಜನಿಗೆ ನೆರವಾಗಿ ಸಾಗರವ ಸೇರುವ ಹೆಮ್ಮೆ
ಹರಿವ ನೀರಿಗಿದೆ

ನಿಂತ ಕೆರೆಯಾಗದೆ ಹರಿವ ನದಿಯಾಗು ಗೆಳೆಯ
ನೋವಿನ ಕಾಡನು ಎದುರಿಸಿ ಮುಂದೆನಡಿ
ಕಷ್ಟಗಳ ಕೋಟಲೆಯ ಧೈರ್ಯದಲಿ ಮಾಡು ಪುಡಿ
ಸ್ವಂತಿಕೆಯ ಎತ್ತಿ ಹಿಡಿ ಸಂಘದಲಿ ನೀನು ದುಡಿ
ಗುರಿಯ ಸೇರುವ ಸಮಯ ಹೆಮ್ಮೆಯಿರಲಿ ನಿನಗೆ
ನಿಂತ ನೀರಾಗದೆ ಹರಿವ ನದಿಯಾದೆನೆಂದು
ನಿಂತ ನೀರಾಗದೆ ಹರಿವ ನದಿಯಾದೆನೆಂದು

ಪವನ್ ಪಾರುಪತ್ತೇದಾರ :-